us ka ḳhayal dil men ghaḌi do ghaḌi rahe
phir is ke ba.ad mez pe chaa.e paḌi rahe
aisa nahin ki ham karen baten na be-hisab
lekin ye kya ki kiil si dil men gaḌi rahe
phir ghar men ek ahani pinjra dikha.i de
khiḌki men kaafi der jo laḌki khaḌi rahe
bikhri ho jaise chandni barg-e-gulab par
muskan us ke honTon pe aaise paḌi rahe
dil men ḳhushi ke phuTte yunhi rahen anaar
teri hansi ki yunhi sada phuljaḌi rahe
khiḌki to ‘shaz’ band main karta huun baar baar
lekin hava-e-shauq ki zid par aḌi rahe
Leave a Reply