Nushur Wahidi
dhaḌkanen dil ki gine ḳhuun men ravani mange
zindagi ishq ki ai dost javani mange
pesh kar daagh agar dil pe koi khaya ho
ishq har ashiq-e-sadiq se nishani mange
zulf-e-shab-gun tire shane pe khuli nagin hai
Das le ye jis ko na phir uTh ke vo paani mange
aadmi ahd-e-javani men raha munkir-e-gham
ab gham-e-dil ki ḳhabar hai to javani mange
husn har gaam pe qaa.em kare ik taaza hijab
ishq parde ki ye divar girani mange
din ko soti hai mohabbat ki kashish ankhon men
raat ko chand sitaron ki kahani mange
mai-kade men mire saaqi ka naya hukm ye hai
shaam ko pyaas lage sub.h ko paani mange
dilbari pesha hai ye chor bhi apne dil ka
aankh har ek haqiqat se churani mange
kya na.e dost-navazo ka bharosa hai ‘nushur’
dosti ye hai ki vo rasm purani mange
Leave a Reply