KHwabon Ki Tafsil Bata Kar Jaenge

ḳhvāboñ kī tafsīl batā kar jā.eñge

jo uTThī hai dhuul biThā kar jā.eñge

aap agar chāheñ to haañ ārām kareñ

ham to bas āvāz lagā kar jā.eñge

kahte haiñ paimān nibhānā mushkil hai

ham apnā paimān nibhā kar jā.eñge

jazbe ne jo rañg nikhāre āñkhoñ meñ

un se ham tasvīr banā kar jā.eñge

aap ne jo dīvār usārī nafrat kī

‘anvar’ ye dīvār girā kar jā.eñge

Leave a Comment