Ahmad Ameer Pasha
ek aalam pe baar hain ham log
adatan sogvar hain ham log
gardish-e-pa junun badhati hai
sang-e-rah ki pukar hain ham log
pichhli sab ranjishon ko bhuul bhi ja
ab tire gham-gusar hain ham log
jante hain hunar mohabbat ka
ahl-e-dil men shumar hain ham log
ab hamen log hans ke milte hain
ab bahut sazgar hain ham log
ham ne mafhum ko zaban di hai
harf ka e’tibar hain ham log
koi chehra to raushni laae
vahimon ka shikar hain ham log
ab tiri dosti ke qabil hain
dil-girafta-o-dil-figar hain ham log
dil churane ka kaam karte hain
bar-sar-e-rozgar hain ham log
ek pal bhi sukun nahin milta
kis qadar be-qarar hain ham log
shahryari bhi ik nasha hai ‘amir’
tere hisse ka pyaar hain ham log
Leave a Reply