Taqat-E-Sabr Tere Be-Sar-O-Saman Mein Nahin

taqat-e-sabr tire be-sar-o-saman men nahin

istaqamat use is alam-e-imkan men nahin

DhunDhta kya hai use ja ke idhar aur udhar

kya tire dil men nahin dida-e-hairan men nahin

kya kahun aah main tashbih nahin de sakta

koi gul zakhm-e-jigar sa to gulistan men nahin

thaam sakte hi nahin khar-e-bayaban mujh ko

taar baaqi koi ab to mire daman men nahin

le gaya jazb-e-dil-e-zar sanam tak un ko

ek lasha bhi yahan gor-e-ghariban men nahin

dekh to chiir ke pahlu men dikha deta huun

juz gham-e-yar koi is dil-e-viran men nahin

nau-giraftar-e-mohabbat huun yahi baais hai

naghma-zan mujh sa koi murgh gulistan men nahin

halqa-e-chashm men zanjir ke in aaza men

aisi kahidgi aai ki jo mizhgan men nahin

dekh kar us lab-e-rangin ko ‘jamila’ ne kaha

jo damak is men hai vo laal-e-badakhshan men nahin

Leave a Comment