Imam Bakhsh Nasikh
mujh ko furqat ki asiri se rihai hoti
kaash iisa ke evaz maut hi aai hoti
ashiqi men jo maza hai to yahi furqat hai
lutf kya tha jo agar us se judai hoti
gar na ho shama to maadum hain parvane bhi
tu na hota to sanam kab ye khudai hoti
ghair se karte ho abru ke ishare har dam
kabhi talvar to mujh par bhi lagai hoti
us ki har dam ki nasihat se main tang aaya huun
kaash naseh se bhi aankh us ne ladai hoti
huun vo gham-dost ki sab apne hi dil men bharta
gham-e-alam ki agar is men samai hoti
khat ke aghaz men to mujh se hua saaf tu kab
lutf tab tha ki safai men safai hoti
abr-e-rahmat se to mahrum rahi kisht miri
koi bijli hi falak tu ne girai hoti
dasht-e-pur-khar men mehndi ki havas bhi nikli
kab hamari kaf-e-pa varna hinai hoti
dhoi kyuun ashk ke tufan se lauh-e-mahfuz
sar-navisht apni hi ‘nasikh’ ne mitai hoti
Leave a Reply