ameer-minai

Firaq-E-Yar Ne Bechain Mujhko Raat Bhar Rakkha

firaq-e-yar ne bechain mujh ko raat bhar rakkha

kabhi takiya idhar rakkha kabhi takiya idhar rakkha

shikast-e-dil ka baaqi ham ne ghurbat men asar rakha

likha ahl-e-vatan ko khat to ik gosha katar rakkha

barabar aine ke bhi na samjhe qadr vo dil ki

ise zer-e-qadam rakkha use pesh-e-nazar rakkha

mitae dida-o-dil donon mere ashk-e-khunin ne

ajab ye tifl abtar tha na ghar rakkha na dar rakkha

tumhare sang-e-dar ka ek tukda bhi jo haath aaya

aziiz aisa kiya mar kar use chhati pe dhar rakkha

jinan men saath apne kyuun na le jaunga naseh ko

suluk aisa hi mere saath hai hazrat ne kar rakkha

na ki kis ne sifarish meri vaqt-e-qatl qatil se

kaman ne haath jode tegh ne qadmon pe sar rakkha

ghazab barse vo mere aate hi maalum hota hai

jagah khali jo paai yaar ko ghairon ne bhar rakkha

bada ehsan hai mere sar pe us ki laghzish-e-pa ka

ki is ne be-tahasha haath mere dosh par rakkha

zamin men dana-e-gandum sadaf men ham hue gauhar

hamare ijz ne har maarka men ham ko dar rakkha

tire har naqsh-e-pa ko rahguzar men sajda-gah samjhe

jahan tu ne qadam rakkha vahan main ne bhi sar rakkha

amiir achchha shagun-e-mai kiya saaqi ki furqat men

jo barsa abr-e-rahmat ja-e-mai shishon men bhar rakkha

More Poems

Leave a Comment