Afzal Naved
rah-e-suluk men bal dalne pe rahta hai
lahu ka khel khalal dalne pe rahta hai
ye dekhta nahin buniyad men hain haddiyan kya
har ek apna mahal dalne pe rahta hai
muhim pe roz nikalta hai tajir-e-barud
aur ek khauf-e-ajal dalne pe rahta hai
aur ek haath milata hai zahr paani men
aur ek haath kanval dalne pe rahta hai
aur ek haath khilata hai shakh par konpal
aur ek haath masal dalne pe rahta hai
aur ek haath uthata hai parcham-e-avaz
aur ek haath kuchal dalne pe rahta hai
aur ek haath badhata hai irtiqa ka sarup
aur ek haath badal dalne pe rahta hai
sab ek radd-e-amal ka amal hai aur nahin
jo ek radd-e-amal dalne pe rahta hai
rujua la-mutazalzal hai jo masail ka
dimagh men koi hal dalne pe rahta hai
ham apna radd-o-badal daal dete hain us men
vo apna radd-o-badal dalne pe rahta hai
miyan-e-sabit-o-sayyar irtikaz mira
abad ke biich azal dalne pe rahta hai
ye sub.h-o-sham pe phaila hua mira hona
ye mere aaj men kal dalne pe rahta hai
har ek rahguzar se guzarta hai suraj
aur ik shua-e-atal dalne pe rahta hai
pasand aate nahin sidhe-sadhe log use
vo apne mathe pe bil dalne pe rahta hai
ravish koi bhi ziyada use nahin bhati
vo apna aap badal dalne pe rahta hai
‘naved’ tair-e-lahauti ka junun to nahin
jo daal daal pe phal dalne pe rahta hai
Leave a Reply