Farigh Bukhari
kuchh nahin garche tiri rahguzar se aage
dekhna kufr nahin hadd-e-nazar se aage
ḳhud-farebi ke liye garm-e-safar hain varna
kya hai manzil ke siva gard-e-safar se aage
mera aflak bhi taskin-e-nazar ho na saka
the vahi shams-o-qamar shams-o-qamar se aage
zindagi vaqt ki divaron men mahbus rahi
koi parda na uTha sham-o-sahar se aage
aaj ke daur ka da.ava hai ki anqa ke siva
koi uqda nahin irfan-e-bashar se aage
qatre qatre ko taraste rahe sahra ‘farigh’
jhuum kar uTThe bhi badal to vo barse aage
Leave a Reply