us ne apne safed papote jhapkae
matyali ankhon se puure asman ko taaka
aur suraj ko god men bhar kar bola
badi aag hai tujh men
chal tujhe qutub-shumali men dafn karte hain
chhote chhote sayyaron ki bhi apni zindagi hoti hai
unhen apne apne kurre par ghumne de
kis men paani hai
kis men hava
ye dekhna tera kaam nahin
apne sayyare pe zindagi ki alamaten dhundhna
talash ka pahla nukta hai
teri duuri farhat-bakhsh hai
qurbat andoh-gin
tujhe god men le kar meri aghosh men chhale pad gae
takhliq ke pahle marhale men
nizam-e-shamsi tartib dete hue
tujhe markaz men rahne dena meri bhuul to nahin