Hameed Almas
jitne achchhe log hain vo mujh se vabasta rahe
mere saare bol un ke lab se paivasta rahe
sab parinde la rahe hain asmanon se ḳhabar
mere ghar angan men aa kar kab vo par-basta rahe
vo tariq-e-ḳhauf-o-dahshat par amal-paira sahi
main ye kahta huun ki qatl-o-ḳhun bhi sha.ista rahe
bavajud-e-ham-nashini us se kuchh paaya na faiz
dil bhi azurda raha halat bhi ḳhasta rahe
kam se kam baaqi rahe sab ke dilon men rasm-o-rah
ye munasib hai gharon ke darmiyan rasta rahe
sarhad-e-imkan se aage thiin yahi tarikiyan
kya zaruri hai andhera har jagah Dasta rahe
umr-bhar karte rahe ‘almas’ milne se gurez
kijiye tahqiq kyuun vo raaz sar-basta rahe
Leave a Reply