Rawan Dawan Nahin Yan Ashk Chashm-E-Tar Ki Tarah

ravan davan nahin yaan ashk chashm-e-tar ki tarah

girah men rakhte hain ham aabru guhar ki tarah

suni sifat kisi khush-chashm ki jo mardum se

khayal daud gaya aankh par nazar ki tarah

chhupi na khalq-e-khuda se haqiqat-e-khat-e-shauq

uda jahan men kabutar mira khabar ki tarah

sivae yaar na dekha kuchh aur aalam men

sama gaya vo miri aankh men nazar ki tarah

adam ki raah men khatka raha jahannam ka

safar ne dil ko jalaya mire saqar ki tarah

khule jo sab to bandha taar mithi baton ka

shakar girah men vo rakhte hain neshkar ki tarah

vo andalib huun shahpar jo mera mil jaae

chadhaen sar pe salatin huma ke par ki tarah

zakat de zar-e-gul ki bahar men gulchin

chaman men phuul luta ashrafi ke zar ki tarah

giri hai chhut ke jo zaanu pe shaam ko afshan

sitare yaar ke daman men hain sahar ki tarah

mushaire ka ‘amanat’ hai kis ko hijr men hosh

kahan ke sher kahan ki ghazal kidhar ki tarah

Leave a Comment