Barae Nam Sahi Saeban Zaruri Hai

barā.e naam sahī sā.ebāñ zarūrī hai

zamīn ke liye ik āsmāñ zarūrī hai

ta.ajjub un ko hai kyuuñ merī ḳhud-kalāmī par

har aadmī kā koī rāz-dāñ zarūrī hai

zarūrat us kī hameñ hai magar ye dhyān rahe

kahāñ vo ġhair-zarūrī kahāñ zarūrī hai

kahīñ pe naam hī pahchān ke liye hai bahut

kahīñ pe yuuñ hai ki koī nishāñ zarūrī hai

kahāniyoñ se malāl un ko niiñd aane lagī

yahāñ pe is liye vo dāstāñ zarūrī hai

Leave a Comment