hans raha hoga shikari jaal phailate hue
ḳhauf aata hai mujhe ghar lauT kar jaate hue
mangte hain log paani ki dua ba-chashm-e-nam
ḳhush hai badal har taraf tezab barsate hue
ḳhamushi to mas.ale ka hal nahin lagti hai aur
baat bigḌi hai hamesha baat manvate hue
muḳhtalif hai soch us ki main ne chaha tha magar
mera bachcha ho baḌa kal mujh ko dohrate hue
ḳhvahishon ne kar diya rusva sar-e-bazar yuun
ab zarurat ro rahi hai haath phailate hue
main usi avaz ke pichhe chala huun jhuum kar
aage aage chal raha hai rasta gaate hue
kaanp uThta hai dil-e-‘maqsud’ gham ke naam par
main to ik ik dard sah leta huun muskate hue
Leave a Reply