Arshad Abdul Hamid
tamam shahr ki ankhon ka mahtab hua
main jab se us ki nigahon men intiḳhab hua
hava ke kandhon ne pahunchaya asmanon tak
main barg-e-sabz tha sukha to aftab hua
palaT ke dekhun to mujh ko saza.en deta hai
ajab sitara rah-e-gham men ham-rikab hua
yuun qaus-e-chashm men aaya vo barishon ki tarah
ki harf-e-did ka.i rangon ki kitab hua
pighal ke aa ga.i saari udasi lafzon men
vufur-e-gham mire a.ine men habab hua
main apni ḳhvahishen gum kar ke mil gaya us ko
ḳhusha vo meri mohabbat men kamyab hua
Leave a Reply