bashar-nawaz

Ye Husn Hai Jharnon Mein Na Hai Baad-E-Chaman Mein

ye husn hai jharnon men na hai bad-e-chaman men

jis husn se hai chand ravan nil-gagan men

ai kaash kabhi qaid bhi hota mire fan men

vo naghma-e-dil-kash ki hai avara pavan men

uth kar tiri mahfil se ajab haal hua hai

dil apna bahalta hai na basti men na ban men

ik husn-e-mujassam ka vo pairahan-e-rangin

Dhal jaae dhanak jaise kisi chandr-kiran men

ai nikhat-e-avara zara tu hi bata de

hai tazgi phulon men ki us shokh ke tan men

dekha tha kahan us ko hamen yaad nahin hai

tasvir si phirti hai magar ab bhi nayan men

is daur men asan to na thi aisi ghazal bhi

kuchh fan abhi zinda hai magar mulk-e-dakan men

More Poems

Leave a Comment