falak ke paar uḌanon ki had nahin hoti
vagarna dusri janib bhi ik zamin hoti
agar rivayati mafhum bhuul kar dekhen
to kya saver bhi kuchh shaam si nahin hoti
vo is tarah miri hoti nahin agar us ki
saheliyon men koi aur bhi hasin hoti
sada.en toḌ na patin ḳhumar ka aalam
agar vo aankh mire ḳhvab ki amiin hoti
vo mujh ko dekhne mere qarib aaya hai
ye dhund saare mahinon men kyuun nahin hoti
mujhe zamin se paani nahin mila ‘haris’
vagarna chhanv bhi meri yahin kahin hoti
Leave a Reply