Arif Abdul Mateen
‘arif’ azal se tera amal mominana tha
haan gham ye tha ki fikr ka Dhab kafirana tha
tu mujh se duur rah ke bhi mere qarib tha
har chand tu ḳhuda ki tarah tha ḳhuda na tha
tanha.i-e-basit ka vo ahd yaad kar
jab tere paas koi bhi tere siva na tha
tha e’timad-e-husn se tu is qadar tahi
a.ina dekhne ka tujhe hausla na tha
main ne kiya hai tujh ko tire ru-ba-ru magar
khinch ja.ega mujhi se tu mujh ko pata na tha
baḳhsha hai tu ne meri vafa ko ḳhud apna rang
varna miri nigah men koi sila na tha
umr-e-aziz ra-navardi men kaT ga.i
manzil ne di ḳhabar ki musafir chala na tha
aa.i hai gulsitan se miri samt kis liye
jab naama mere naam koi ai saba na tha
kunj-e-qafas men sar-ba-gareban paḌa huun main
‘arif’ chaman men koi mira ham-nava na tha
Leave a Reply