Inki Jab Nukta-Wari Yaad Aai

Qayyum Nazar

in ki jab nukta-vari yaad aa.i

apni hi be-ḳhabari yaad aa.i

yaad aa.i bhi to yuun ahd-e-vafa

aah ki be-asari yaad aa.i

aaj kyuun un ko ba-aghosh-e-raqib

meri hi ham-asari yaad aa.i

dil ne phir vaqt se laḌna chaha

phir vahi dard-bhari yaad aa.i

apna siina hua raushan to unhen

husn ki kam-nazari yaad aa.i

jab bhi dhyan aaya kahin manzil ka

raah ki shab-basari yaad aa.i

kis ko hasil hai dimagh-e-nala

be-sabab be-hunari yaad aa.i

dekh kar be-dili-e-shauq ka rang

apni ashufta-sari yaad aa.i

us pe kya guzri jo is aalam men

phuul ko jama-dari yaad aa.i

baagh ka haal vo dekha hai ‘nazar’

shaḳh thi jo bhi hari yaad aa.i