Farhat Ehsas
auron ka saara kaam mujhe de diya gaya
aur mera kaam jaane kise de diya gaya
mujh se kaha gaya ki utaro ab apne aks
a.ina ik charagh tale de diya gaya
thi ye miri saza pe maze aa ga.e mire
ik ghar har ek ghar ke pare de diya gaya
kanTon bhari jo raah thi yuun hi rakhi ga.i
bas nuur ablon men mire de diya gaya
ta.abir jis ki aisa hi ek aur ḳhvab ho
ik aur ḳhvab roz mujhe de diya gaya
da.ava kisi ka din ke ujalon pe ab nahin
jo kuchh bhi tha vo raat ga.e de diya gaya
‘ehsas-ji’ vahin the magar kuchh na pa sake
sab kuchh unhen jo aa.e na the de diya gaya
Leave a Reply