ain mumkin hai ye duniya tujhe shahkar lage
us ki ta.amir men ham jaise gunahgar lage
dekhne men to bahut phuul the us Tahni par
chhu ke dekha to sabhi phuul hamen ḳhaar lage
main ne to zaḳhm ḳharide hain na beche hain kabhi
phir bhi ye dil ki koi dard ka bazar lage
ik javan gham ka natija hai ki aksar mujh ko
raah chalta hua har shaḳhs azadar lage
naḳhuda niind men hai aur samundar bedar
sina-e-mauj pe kab dekhiye patvar lage
aisi tasvir bana.unga main dariya ki ‘adil’
vo jo us paar nazar aata hai is paar lage
Leave a Reply