kabhi tiri kabhi apni hayat ka gham hai
har ek rang men nakamiyon ka matam hai
khayal tha tire pahlu men kuchh sukun hoga
magar yahan bhi vahi iztirab paiham hai
mire mazaq-e-alam-ashna ka kya hoga
tiri nigah men shoale hain ab na shabnam hai
sahar se rishta-e-ummid bandhne vaale
charagh-e-zist ki lau shaam hi se maddham hai
ye kis maqam pe le aai zindagi ‘rahi’
ki har qadam pe ajab bebasi ka aalam hai
Leave a Reply