zindagi ki raah men ik moḌ aisa aa.ega
jis ke aage har koi ḳhud ko akela pa.ega
kaun kitna zabt kar sakta hai karb-e-hijr ko
rail jab chalne lagegi faisla ho ja.ega
aaj bhi us ruThne vaale se ye ummid hai
meri janib dekh kar ik baar to muska.ega
is tarah dega saza apna.iyat ke jurm ki
main use apna kahun vo ghair ke gun ga.ega
ab hamari aankh men manzar na koi ḳhvab hai
tujh se ik rishta dhanak rangon ki chadar la.ega
jal chuke miT bhi chuke kab se gharibon ke makan
ye dhuan kab tak hamare zehn men lahra.ega
de to aa.e us ko saare faisle karne ka haq
dil larazta hai muqadma kis ke haq men ja.ega
Leave a Reply