mirza-ghalib

Aabru Kya Khak Us Gul Ki Ki Gulshan Mein Nahin

aabru kya khaak us gul ki ki gulshan men nahin

hai gareban nang-e-pairahan jo daman men nahin

zof se ai girya kuchh baaqi mire tan men nahin

rang ho kar ud gaya jo khuun ki daman men nahin

ho gae hain jama ajza-e-nigah-e-aftab

zarre us ke ghar ki divaron ke rauzan men nahin

kya kahun tariki-e-zindan-e-gham andher hai

pamba nur-e-subh se kam jis ke rauzan men nahin

raunaq-e-hasti hai ishq-e-khana viran saaz se

anjuman be-shama hai gar barq khirman men nahin

zakhm silvane se mujh par chara-jui ka hai taan

ghair samjha hai ki lazzat zakhm-e-sozan men nahin

bas-ki hain ham ik bahar-e-naz ke maare hue

jalva-e-gul ke siva gard apne madfan men nahin

qatra qatra ik hayula hai nae nasur ka

khuun bhi zauq-e-dard se farigh mire tan men nahin

le gai saaqi ki nakhvat qulzum-ashami miri

mauj-e-mai ki aaj rag miina ki gardan men nahin

ho fishar-e-zof men kya na-tavani ki numud

qad ke jhukne ki bhi gunjaish mire tan men nahin

thi vatan men shaan kya ‘ghalib’ ki ho ghurbat men qadr

be-takalluf huun vo musht-e-khas ki gulkhan men nahin

More Poems

Leave a Comment