kabhi kisi se na ham ne koi gila rakkha
hazar zaḳhm sahe aur dil baḌa rakkha
charagh yuun to sar-e-taq-e-dil ka.i the magar
tumhari lau ko hamesha zara juda rakkha
ḳhirad se puchha junun ka mo.amla kya hai
junun ke aage ḳhirad ka mo.amla rakkha
ḳhayal ruuh ke aram se haTaya nahin
jo ḳhaak tha so use ḳhaak men mila rakkha
hazar shukr tira ai mire ḳhuda-e-junun
ki mujh ko rah-e-ḳhirad se gurez-pa rakkha
chhapa hua nahin tujh se dil-e-tabah ka haal
ye kam nahin ki tire ranj ko bacha rakkha
vo ek zulf ki lipTi rahi rag-e-jan se
vo ik nazar ki hamen jis ne mubtala rakkha
bas ek aan men guzra main kis taghayyur se
kisi ne sar pe tavajjoh se haath kya rakkha
suna.i apni kahani baḌe saliqe se
kahin kahin pe fasane men vaqi.a rakkha
suna jo shor ki vo shisha-gar kamal ka hai
to ham lapak ke ga.e aur qalb ja rakkha
main janta tha ki duniya jo hai vo hai hi nahin
so ḳhud ko ḳhvahish-e-duniya se mavara rakkha
mire junun ne kiye radd vajud aur adam
alag hi tarah se hone ka silsila rakkha
ḳhushi si kis ne hamesha malal men rakkhi
ḳhushi men kis ne hamesha malal sa rakkha
kabhi na hone diya taq-e-dil ko be-raunaq
charagh ek bujha aur dusra rakkha
nigah-dar mira tha mire siva na koi
so apni zaat pe pahra bahut kaḌa rakkha
tu paas tha to rahe mahv dekhne men tujhe
visal ko bhi tire hijr par uTha rakkha
tira jamal to tujh par kabhi khulega nahin
hamare ba.ad bata aa.ine men kya rakkha
har ek shab tha yahi tere ḳhush-guman ka haal
diya bujhaya nahin aur dar khula rakkha
hamin pe faash kiye raz-ha-e-harf-o-suḳhan
to phir hamen hi tamasha sa kyuun bana rakkha
mila tha ek yahi dil hamen bhi aap ko bhi
so ham ne ishq rakha aap ne ḳhuda rakkha
ḳhizan thi aur ḳhizan si ḳhizan ḳhuda ki panah
tira ḳhayal tha jis ne hara-bhara rakkha
jo na-gahan kabhi izn-e-safar hua ‘irfan’
to fikr kaisi ki saman hai bandha rakkha
Leave a Reply