Saifuddin Saif
chhup chhup ke ab na dekh vafa ke maqam se
guzra hamara dard dava ke maqam se
lauT aa.e ham to arz-e-dua ke maqam se
har shai thi past un ki raza ke maqam se
ai mutriban-e-kunj-e-chaman hoshiyar-bash
sarsar guzar rahi hai saba ke maqam se
allah-re ḳhud-farebi-e-ahl-e-haram ki ab
bande bhi dekhte hain ḳhuda ke maqam se
jab dil ne ḳhair-o-shar ki haqiqat ko pa liya
har jurm tha buland saza ke maqam se
ai vaa.e ‘saif’ lazzat-e-nairangi-e-hayat
mar kar uThenge bim-o-raja ke maqam se
Leave a Reply