Hasrat Mohani
vasl ki banti hain in baton se tadbiren kahin
arzuon se phira karti hain taqdiren kahin
be-zabani tarjuman-e-shauq behad ho to ho
varna pesh-e-yar kaam aati hain taqriren kahin
miT rahi hain dil se yaden rozgar-e-aish ki
ab nazar kaahe ko a.engi ye tasviren kahin
iltifat-e-yar tha ik ḳhvab-e-aghaz-e-vafa
sach hua karti hain in ḳhvabon ki ta.abiren kahin
teri be-sabri hai ‘hasrat’ ḳham-kari ki dalil
girya-e-ushshaq men hoti hain tasiren kahin
Leave a Reply