Nirmal Nadeem
mere honTon pe miri ah-o-fughan hai janan
log kahte hain baḌi talḳh zaban hai janan
jante hain ki mohabbat ka maraz hai mujh ko
puchh lete hain magar dard kahan hai janan
daas lagte hain ye duniya ke suḳhnavar tere
teri baton ka vo andaz-e-bayan hai janan
kah ke patthar jise duniya ne laga di Thokar
vo mira dil hai mohabbat ka makan hai janan
dard divar pe mandir ki likhi chaupa.i
aah meri kisi masjid ki azaan hai janan
kar ke ghayal mujhe ma.asum bani baiThi hai
teri ankhon pe jo palkon ki kaman hai janan
mere siine pe zara dast-e-hina rakh do tum
dil men ab ishq ka ḳhurshed javan hai janan
kar li mahtab ne ye dekh ke raten kaali
tere honTon pe jo ik til ka nishan hai janan
teri ankhon men mire donon jahan baste hain
tere qadmon pe lagi ḳhaak men jaan hai janan
Leave a Reply