ab to aankh se itna jaadu kar leta huun
jis ko chahun us ko qaabu kar leta huun
mere haath men jab se us ka haath aaya hai
ḳhaar ko phuul aur phuul ko ḳhushbu kar leta huun
raat ki tanha.i men jab bhi ghar se niklun
us ki yadon ko main jugnu kar leta huun
dil ka dariya sahra hone se pahle hi
apni har ik ḳhvahish aahu kar leta huun
jab bhi dil ki samt ‘hasan’ baḌhta hai koi
us ke aage apne baazu kar leta huun
Leave a Reply