chal saki kuchh na rah-e-ishq men tadbir miri
rang laati rahi har gaam pe taqdir miri
aa.ina kya hai faqat hamil-e-aks-e-jalva
varna har zarra-e-alam pe hai tasvir miri
raaz se apne main agah nahin huun phir bhi
janta huun ki ye kaunain hai tafsir miri
atish-e-ishq ka ik sho.ala-e-be-bak huun main
ab-o-gil se nazar aati nahin ta.amir miri
afrin jalva-e-bebak ḳhusha faiz-e-jamal
meri nazron ko dikha.i ga.i tasvir miri
ye nazar ko hai gila shauq ne Daale parde
shauq kahta hai nazar ban ga.i zanjir miri
ab to main huun rasan-o-dar ki manzil hai bashir
be-ḳhudi jurm mira ishq hai taqsir miri
Leave a Reply