Naina Adil
tire aks se miri zaat men hai latif hijr-o-visal sa
dam-e-sub.h koi umang si sar-e-sham koi malal sa
tiri bu-e-ḳhush ke surur se tiri raushni ke vafur se
mire nain gahre siyah se mira rang surḳh gulal sa
magar agahi ki talab se hai hama-vaqt nok-e-zaban par
koi lafz lafz-e-guman sa koi harf harf-e-saval sa
jise zindagi ke rafu libas ke saare baḳhiye qubul hain
use phir labada qaza ka bhi hua narm reshon ki shaal sa
chalo DhunDen shahar-e-numud men koi shaḳhs paikar-e-zindagi
koi dosti ki nazir sa koi dilbari ki misal sa
mira intiqam bhi harf hain mira ehtimam bhi harf hain
kabhi giit giit tarang si kabhi sher sher vabal sa
Leave a Reply