ye yaqin ye guman hi mumkin hai
tujh se milna yahan hi mumkin hai
khvab ik mumkin o mayassar ka
garche us ka bayan hi mumkin hai
behad o be-hisab shauq men bhi
qasd ku-e-butan hi mumkin hai
tangna-e-jahan-e-zahir men
ye zamin ye zaman hi mumkin hai
had se had is rah-e-hazimat men
pursish-rah-ravan hi mumkin hai
atish-e-dil pe dalne ke liye
reg-e-rah-e-ravan hi mumkin hai
sarhad-e-mumkinat se aage
sar pe ik asman hi mumkin hai
aan baithe ki ji lagane ko
sohbat-e-dostan hi mumkin hai
arsa-e-zindagi men teri miri
sirf ik dastan hi mumkin hai
kya tamasha hai yaan uthane ko
ek bar-e-giran hi mumkin hai
Leave a Reply