har ek chehra abhi ashna naya naya hai
ki shak to lazmi hai aa.ina naya naya hai
tiri raza ke mutabiq hi faisle honge
tu sabr kar ki abhi rabta naya naya hai
vo ba.ad tark-e-ta.alluq kare hai yaad mujhe
use saliqa nahin bevafa naya naya hai
vahi masarrat-e-vasl aur vahi azab-e-firaq
juz ek naam mohabbat men kya naya naya hai
paḌi hain mez pe bikhri kisi ki tasviren
nigah rakhiye ki ghar men diya naya naya hai
ab us ka naam chalo e’tibar hi rakh len
zaban-e-vasl pe ik aabla naya naya hai
jo da.imi hai zamin-o-falak ke beach ‘afaq’
hamare darmiyan vo fasla naya naya hai
Leave a Reply