Be-iKHtiyar Hum Jo Sar-E-Bazm Ro Diye

Mahendra Partap Chand

be-iḳhtiyar ham jo sar-e-bazm ro diye

kitne sunahre ḳhvab in ankhon ne kho diye

tanha.iyon ki dhuup men yadon ki ye phuvar

jaise kisi ne dil ke sabhi zaḳhm dho diye

phir aaj kyon hava.en ye sahmi hui si hain

kis ne ye phir fazaon men nashtar chubho diye

ai dost kuchh to baat ka mafhum bhi bata

lafzon ke haar tu ne bahut ab piro diye

shayad tiri vafaon men koi kami hui

ai ‘chand’ tu ne yaar purane jo kho diye