Hasan Akhtar Jaleel
phandti phirti hain ehsas ke jangal ruhen
kab sakun pa.engi bhaTki hui be-kal ruhen
pa-shikasta hain shab-o-roz ke virane men
DhunDti hain kise is dasht men pagal ruhen
jab bhi uThte hain nigahon se gham-e-jan ke hijab
dekh leti hain kisi shoḳh ka anchal ruhen
runuma ho chaman-e-dahr men ai abr-e-nashat
dard ki dhuup men sanvla.i hain komal ruhen
dil ke ujḌe hue mandir ko basane ke liye
le ke aa.i thiin kisi yaad ki mash.al ruhen
raat sapnon ki sabha men mire hamrah rahin
jab khuli aankh huiin aankh se ojhal ruhen
Leave a Reply