vo yuun shakl-e-tarz-e-bayan khinchte hain
ki qaa.il ki goya zaban khinchte hain
ye tash.hir dekho sag-e-ku-e-dilbar
abhi tak miri haDDiyan khinchte hain
kare gar koi zikr ja kar hamara
vo taalu se us ki zaban khinchte hain
na sadme se kyuun ḳhushk ho ḳhun-e-bulbul
gulon ka araq baghban khinchte hain
baḌhi hai safar men vatan ki mohabbat
makinon ko kya kya makan khinchte hain
kare kaun sauda-e-zulf-e-musalsal
hamin hain jo ye beḌiyan khinchte hain
pas-e-marg me.araj ashiq ki dekho
lahad ki zamin asman khinchte hain
nishana bana.enge tir-e-nazar ka
mohabbat ke dil par nishan khinchte hain
zara dam to lene de ai maut mujh ko
Thahar kar nafas na-tavan khinchte hain
za.ifi men bhi dil men hai yad-e-abru
kabada hain ḳhud aur kaman khinchte hain
mujhe dekh kar jab vo munh moḌte hain
to dil men chhupa kar sinan khinchte hain
ghazab hai hasinon ka taur-e-takallum
dilon ko ye jadu-bayan khinchte hain
baḌha fikr men rang zardi-e-ruḳh se
ye itr-e-gul-e-za.afran khinchte hain
‘habib’ ab zamin asman sar pe lenge
ki naale mire bijliyan khinchte hain
Leave a Reply