gham men ahd-e-shabab jaata hai
asman khaak men milata hai
kaun gul bahr-e-sair aata hai
baagh phula nahin samata hai
arsh par bhi ghubar jaata hai
dil jo vahshat men khaak udata hai
jaan deta hai sabza-e-khat par
khizr har roz zahr khata hai
tegh-e-qatil jo ho gai be-ab
zakhm paani magar churata hai
zinde marte hain murde jiite hain
jab vo rashk-e-masih gaata hai
sahar-e-sham-e-vasl hai shab-gor
maut aati hai yaar jaata hai
achchhi padti hai jab koi talvar
dahan-e-zakhm muskurata hai
khun-e-ushshaq ka utha biida
be-sabab kab vo paan khata hai
jigar-e-sang ho jahan paani
vo vahan mujh ko azmata hai
tu jo gul hai to main bhi shabnam huun
mujhe hansna tira rulata hai
khush ye marne se huun mira lasha
gor men bhi nahin samata hai
lala-e-koh se hua sabit
khun-e-fariyad josh khata hai
laakh taqlid kijiye ai ‘arsh’
par kab andaz-e-‘mir’ aata hai
Leave a Reply