qillat ḳhulus ki hai mohabbat ka kaal hai
is shahr-e-na-sipas men jiina muhal hai
peḌon pe chandni ke hayule hain mahv-e-raqs
kamre men tirgi ki lakiron ka jaal hai
sanson ka rabt jaise musalsal azaab ho
vo shaḳhs kya jiye jise tera ḳhayal hai
lamhon ne chhin li hai ruton se shaguftagi
ye saal mausamon ke taghayyur ka saal hai
ab to shikast-e-jan ke amal se najat de
ye na-tavan vajud dukhon se niDhal hai
chiḌiyan chahak chahak ke pareshan ho ga.iin
kavvon ka shor ghar ki faza ka vabal hai
phulon ka lams chand ki ThanDak bhi hech hai
vo ḳhush badan to aap hi apni misal hai
aa phir se mere pyaar ki taqdis ban ‘niyaz’
aa kanpte labon pe tira hi saval hai
Leave a Reply