Kashfi Lucknavi
mera darman hai na ka.abe men na but-ḳhane men
rind huun mujh ko paḌa rahne do mai-ḳhane men
us ko samjhi hai na samjhegi majazi duniya
hai haqiqat hi haqiqat mire afsane men
liye phirti hai mujhe manzil-e-janan ki talash
chain hasil hai gulistan men na virane men
un ke kahne se use toḌ duun kaise aḳhir
ilm jin ko nahin kya hai mire paimane men
rabt-e-baham bhi ajab shai hai gale milte hi
sham.a ka nuur nazar aata hai parvane men
husn ru-posh hai to diid ke qabil kya hai
ab kise dekhun bhala dahr ke gham-ḳhane men
sinche jaao ise tum apne lahu se kashfi
phuul khil ja.enge ik din isi virane men
Leave a Reply