apni sachcha.i ka azar jo paale hue hain
ḳhud ko ham gardish-e-afat men Daale hue hain
band muTThi men jo ḳhushbu ko sambhale hue hain
ye samajhte hain ki tufan ko Taale hue hain
hain to abad magar dar-badari ki zad par
vo bhi meri hi tarah ghar se nikale hue hain
apni raftar se aage bhi nikal sakta huun
mujh pe kab haavi mire paanv ke chhale hue hain
ab kisi bab-e-sama.at pe na dastak denge
dafn sahra ki fazaon men jo naale hue hain
surḳh-ru jo hai vo mera koi ham-zad hai kya
nok-e-neza pe vo sar kis ka uchhale hue hain
un ke shane hain har ik bar-e-garan se ḳhali
ab vo dastar nahin sar ko sambhale hue hain
vaz.a ka paas bhi rakhne ke rahe ahl kahan
ḳhud ko ham aur kisi sanche men Dhale hue hain
us ki ḳhushbu se tilismat ka dar khulne laga
dida-o-dil qad-o-gesu ke havale hue hain
Leave a Reply