vaqt par ishq-e-zuleḳha ka asar lagta hai
aḳhir-e-umr bhi aghaz-e-safar lagta hai
ye samundar hai magar soḳhta-jan sha.ir ko
kisi majbur ka ik dida-e-tar lagta hai
sub.h-e-taza hai muqaddar dil-e-mayus Thahar
shajar-e-ummid pe in.am-e-samar lagta hai
main zaban-bandi ka ye ahd nahin toḌunga
haan magar is dil-e-gustaḳh se Dar lagta hai
hamen idrak-e-mohabbat to nahin hai lekin
itna ma.alum hai is khel men sar lagta hai
Leave a Reply