aks a.ina-ḳhana se alag rakkha hai
vahshat-e-zat ko sahra se alag rakkha hai
ḳhud ko main ḳhud se bhi milne nahin deta hargiz
apni duniya ko bhi duniya se alag rakkha hai
main kahan sa.at-e-imroz men rahne vaala
main ne har roz ko farda se alag rakkha hai
do mahazon pe abhi ma.arka-ara.i hai
ḳhema-e-sabr ko dajla se alag rakkha hai
ḳhushk mashkiza-e-hulqum ki nigarani men
pyaas ke ḳhitte ko dariya se alag rakkha hai
vo to kahta hai tiri zaat men zam huun lekin
us ne bhi ḳhud ko bas ik la se alag rakkha hai
kitna asan hai ye jada-e-dushvar bhi ab
apna har naqsh kaf-e-pa se alag rakkha hai
main ‘yagana’ ka taraf-dar nahin huun ‘shahid’
is liye miir ko mirza se alag rakkha hai
Leave a Reply