kaam ki baat main ne ki hi nahin
ye mira taur-e-zindagi hi nahin
ai umiid ai umid-e-nau-maidan
mujh se mayyat tiri uThi hi nahin
main jo tha us gali ka mast-e-ḳhiram
us gali men miri chali hi nahin
ye suna hai ki mere kuuch ke ba.ad
us ki ḳhushbu kahin basi hi nahin
thi jo ik faḳhta udaas udaas
sub.h vo shaḳh se uḌi hi nahin
mujh men ab mera ji nahin lagta
aur sitam ye ki mera ji hi nahin
vo jo rahti thi dil-mohalle men
phir vo laḌki mujhe mili hi nahin
ja.iye aur ḳhaak uḌa.iye aap
ab vo ghar kya ki vo gali hi nahin
haa.e vo shauq jo nahin tha kabhi
haa.e vo zindagi jo thi hi nahin
Leave a Reply