ai jazb-e-dil vo din to mayassar khuda kare
mere liye vo haath utha kar dua kare
main jaan duun vafa se vo mujh par jafa kare
marna to mera apne hi dar par rava kare
pamal shauq se dil-e-ashiq kiya kare
ye bhi tamasha shokhi-e-rang-e-hina kare
husn-e-butan men shan-e-ilahi hai kya kahun
baithe na but-kade men fidai to kya kare
is naznin se kah de ki ban jaae nur-e-jan
ankhon men aae kaaba-e-dil men raha kare
halat ko meri sun ke ajab naaz se sanam
kahta hai mujh ko gham nahin koi mira kare
dekhe mire sanam ko to rahban-e-ishq bhi
salle-ala kahe kabhi shukr-e-khuda kare
kah dena un ke talib-e-didar se yahi
mirat ke dil men surat-e-hairat raha kare
is aarzu ne mujh ko bulaya hai khaak men
ta musht-e-khak ko mire vo naqsh-e-pa kare
puchha tha main ne qais se ja kar ye dasht men
jis men na hoe sabr-o-tahammul vo kya kare
bola vo hans ke ji se guzarna hi khuub hai
is ibtida-e-ishq ki yuun intiha kare
fasl-e-bahar aai hai mujh ko na rokiye
jaata huun ab to dasht men kuchh bhi hua kare
tasvir-e-yar dil men ‘jamila’ liye raho
kaabe men ja ke ashiq-e-nashad kya kare
Leave a Reply