narm lahje men tahammul se zara baat karo
phir ba-sad-shauq sar-e-am mujhe maat karo
ya nisar aaj karo mujh pe tamam apne hunar
ya nazar-band mire saare kamalat karo
main rivayat se baghi to nahin huun lekin
tum se mumkin ho to tabdil-e-ḳhayalat karo
ek muddat se mire dil ka nagar hai viran
aao is dasht pe tum phulon ki barsat karo
fasl ujalon ki siyah-baḳht zamin uglegi
zar-nigar apne zara kashf-o-karamat karo
is tarah mil ke bichhaḌna to qayamat hoga
mushta.il tum na miri jaan mire jazbat karo
be-niyazi to mila karti hai duniya se ‘ḳhayal’
tum kisi taur na tajdid-e-gham-e-zat karo
Leave a Reply