jala ke mishal-e-jan ham junun-sifat chale
jo ghar ko aag lagae hamare saath chale
dayar-e-sham nahin manzil-e-sahar bhi nahin
ajab nagar hai yahan din chale na raat chale
hamare lab na sahi vo dahan-e-zakhm sahi
vahin pahunchti hai yaaro kahin se baat chale
sutun-e-dar pe rakhte chalo saron ke charagh
jahan talak ye sitam ki siyah raat chale
hua asiir koi ham-nava to duur talak
ba-pas-e-tarz-e-nava ham bhi saath saath chale
bacha ke laae ham ai yaar phir bhi naqd-e-vafa
agarche lutte rahe rahzanon ke haath chale
phir aai fasl ki manind barg-e-avara
hamare naam gulon ke muraslat chale
qatar-e-shisha hai ya karvan-e-ham-safaran
khiram-e-jam hai ya jaise kaenat chale
bula hi baithe jab ahl-e-haram to ai ‘majruh’
baghal men ham bhi liye ik sanam ka haath chale