Husn-E-Asnam Ba-Har-Lamha Fuzun Hai Ki Nahin

Ravish Siddiqi

husn-e-asnam ba-har-lamha fuzun hai ki nahin

ye mire zauq-e-tamasha ka fusun hai ki nahin

kuchh to irshad ho ai tamkinat-e-an-e-jamal

ishq sha.ista-e-tahzib-e-junun hai ki nahin

ye jahan-e-mai-o-mina-o-subu ai vaa.iz

partav-e-nargis-e-mastana hai kyuun hai ki nahin

shola-e-sham.a se ḳhakistar-e-parvana tak

ek hi silsila-e-soz-e-darun hai ki nahin

halqa-e-bad-e-saba tazkira-e-zulf-e-sanam

is men kuchh sha.eba-e-zauq-e-junun hai ki nahin

baste jaate hain nagar dil hain tabah o viran

agahi dushman-e-duniya-e-sukun hai ki nahin

ham vo hain aaj ‘ravish’-e-sahib-e-divan-e-ghazal

ye sab us chashm-e-suḳhan-go ka fusun hai ki nahin