Munazza Sahar
duniya ki ab-o-tab se aage chale ga.e
ham ishq ke azaab se aage chale ga.e
ankhon ne likh liye hain fasane umiid ke
aansu fasil-e-ab se aage chale ga.e
us ne qubuliyat ki sanad jab se di mujhe
sab harf is kitab se aage chale ga.e
jab ḳhushbuon ke dar pe hui raushni to ham
gulshan ke har gulab se aage chale ga.e
ḳhamoshiyon ki jab se samajhne lage zaban
lafzon ke iztirab se aage chale ga.e
ankhen chamak uThi hain jo raushan ḳhayal se
divangi ke ḳhvab se aage chale ga.e
Leave a Reply