Krishna Kumar Toor
main manzar huun pas-e-manzar se mera rishta bahut
aḳhir meri peshani par suraj chamka bahut
jaane kaun se ism-e-ana ke ham zindani the
tere naam ko le kar ham ne ḳhuda ko chaha bahut
un se kya rishta tha vo kya mere lagte the
girne lage jab peḌ se patte to main roya bahut
kaisi masafat samne thi aur safar tha kaisa lahu
main ne us ko us ne mujh ko muḌ ke dekha bahut
kis ke dast-e-saval men hai ik lambi chup ka charagh
jhankta hai kyuun ik khiḌki se koi chehra bahut
hai dariya ke lams pe nazan ik kaghaz ki naav
suraj se baten karta hai ek daricha bahut
saari umr kisi ki ḳhatir suuli pe laTka raha
shayad ‘tur’ mere andar ik shaḳhs tha zinda bahut
Leave a Reply