isi tarah uga tha aur isi tarah se Dhal gaya
ye aaj bhi yuun hi gaya ki jis tarah se kal gaya
jo mahv-e-fikr-e-zist hain unhen bhala ye kya ḳhabar
tulua maah kab hua kab aftab Dhal gaya
tamam ahl-e-bazm lab-kusha se ho gaya hain kyuun
ye aḳhir aisa kya miri zaban se nikal gaya
jo kar raha tha aftab ko nichoḌne ki baat
bas ik shua ke lams se vo mom se pighal gaya
jo puchha ik faqir se safar ka aḳhiri maqam
qadam ki ḳhaak uTha ke vo miri jabin pe mal gaya
kisi ki aah zehn par asar kuchh aisa kar ga.i
mira tamam dard-e-dil suḳhan men hi badal gaya
to tark nisbaten nasib se kar raha hai par
bulandiyon se paanv gar kabhi tira phisal gaya
hai kis qadar mizaj udaas pattharon ka dekhiye
koi to hai jo raste pe gir ke phir sambhal gaya
malal ki to duur tak umiid mujh ko kya rahe
jab us ke zehn se mira ḳhayal hi nikal gaya
Leave a Reply