Isi Tarah Uga Tha Aur Isi Tarah Se Dhal Gaya

isī tarah ugā thā aur isī tarah se Dhal gayā

ye aaj bhī yuuñ hī gayā kī jis tarah se kal gayā

jo mahv-e-fikr-e-zīst haiñ unheñ bhalā ye kyā ḳhabar

tulūa maah kab huā kab āftāb Dhal gayā

tamām ahl-e-bazm lab-kushā se ho gayā haiñ kyuuñ

ye āḳhir aisā kyā mirī zabān se nikal gayā

jo kar rahā thā āftāb ko nichoḌne kī baat

bas ik shuā ke lams se vo mom se pighal gayā

jo pūchhā ik faqīr se safar kā āḳhirī maqām

qadam kī ḳhaak uThā ke vo mirī jabīñ pe mal gayā

kisī kī aah zehn par asar kuchh aisā kar ga.ī

mirā tamām dard-e-dil suḳhan meñ hī badal gayā

to tark nisbateñ nasīb se kar rahā hai par

bulandiyoñ se paañv gar kabhī tirā phisal gayā

hai kis qadar mizāj udaas pattharoñ kā dekhiye

koī to hai jo rāste pe gir ke phir sambhal gayā

malāl kī to duur tak umiid mujh ko kyā rahe

jab us ke zehn se mirā ḳhayāl hī nikal gayā

Leave a Comment